今期街拍去到旺角，喺炎熱潮濕嘅仲夏夜，捕捉都市入面當代年青人時下造型。
喺台式飲品店對面，發現家琪同緊身邊嘅朋友傾偈，被佢嘅裝扮吸引之下就邀請佢進行街拍。家琪頭上有一條手織頭帶，配上帶少少grunge風格嘅黑色tee同不規則流蘇邊牛仔長裙，隨性、暗黑風格衣物配搭與嘉琪嘅笑容、慢節拍嘅談吐有強烈反差感。
準備影相嘅時候，家琪拎岀飛天小女警嘅手提鏡同梳仔，被攝影師提議用作小道具，結果亦成為小編覺得最捕捉到嘉琪個性嘅相片。
你心目中嘅BOLD LOOK係？
家琪 (@i.am.super.hero ) – 「揾到自己喜歡嘅風格，學習、消化當中嘅元素，套用到自己日常打扮。」
有一種樂趣係同知己一齊打扮行街，為大家互相挑選適合嘅衣着，即使未有戰利品仍然覺得好滿足！而今次邀請街拍嘅對象就係拍檔行街嘅Sammi同楚渝。
Sammi染咗一頭齊陰及肩公主切紅髮，橙紅色無袖上衣以及豹紋短裙，配搭紅黑相間長襪搭配毛毛襪套，飾品方面加上袖套同頸圈，並以厚底鞋作結。
而楚渝就以水藍色作主調，頭上嘅髮帶、絲絨背心同Lace短襪都同樣襯色，外加上毛毛手帶同皺褶襪套，亦同樣配搭上厚底鞋。
一藍一紅嘅配搭，仿如千禧年代少女漫畫中嘅雙子星組合，回頭率滿滿。
Inez嘅打扮以歐美復古風打扮為主，簡約嘅黑色無袖上衣搭配牛仔低腰A字長裙，再加上藍黑格紋背包，色系配襯得宜令整個造型更加完滿。飾品方面，Inez選擇咗今季大熱嘅橢圓框玳瑁太陽眼鏡以及夏天少見嘅條紋冷帽，襯落夏天服飾亦未見累贅，而佢更透露太陽眼鏡係嚟自媽媽嘅經典收藏，街拍當日靈機一觸加入造型，恰巧有機會俾我哋捕捉。
問到造型入面最鐘意嘅部份，思齊就認為係佢嘅低腰牛仔裙，因為岩岩好可以展示佢腰間嘅紋身。
你心目中嘅BOLD LOOK係？
Inez （@_seechai_) – 「敢於同其他人唔一樣。」
街拍當日小編與攝影師已攝影至深夜，打算到附近遊戲機中心，將剩餘嘅菲林都自己影完之際，我哋遇到廢土風衣著嘅Szeman，於是斗膽邀請街拍。
廢土風源自Wasteland Punk概念，係一種被世界末日、人類過度發展啟發嘅假想，廢土風服飾正正就係假想嘅延伸。作為「末日裝束」，佢哋並唔會有鮮艷亮麗嘅配色，深啡深灰等大地色系，再配合洗水、造舊同破壞等等，都係廢土風常見嘅設計元素。
Szeman著住一件深灰色廢土風背心，背心同相連嘅帽同手袖都係同一組單品，充滿設計感。Szeman下身配搭一條黑色寬版型長裙褲，屬於低調百搭嘅配搭選項。
你心目中嘅BOLD LOOK係？
Sze Man （@3lzk52) – 「著得性感而自信大方。」