今期街拍去到位於尖沙咀@heath_hk、一個充滿藝術圈新銳嘅展覽，探索年輕藝術家嘅創作之餘，亦留意佢哋嘅個性穿著，今次有幸邀請到紋身師Iris、多媒體裝置藝術家Lilian、造型設計Jessica同劇場演員Dan，分享佢哋身上嘅穿搭。
首先介紹嘅係來自本地紋身師@iirisyung，展場中到處都有佢嘅口號”Buy My Art Before I Die”，今次展覽中展示數幅潑墨畫作均由佢親自繪製，風格隨性而具有力量。
至於穿搭上，Iris著嘅係一身丹寧組合，上身搭配牛仔帽衫外套、白襯衫同黑領呔，下身配搭牛仔褲與黑皮鞋。牛仔帽衫搭恤衫令整個造型唔會太過正裝，整體感覺清爽俐落，同佢作品風格如出一轍。
你心目中嘅BOLD LOOK係？
Iris @iirisyung – 「想著咩就著咩，想點就點。」
多媒體裝置藝術家Lilian@ioooooi._.ioooooi 一身寛鬆黑色造型，絲質襯衫配絲質紋理長褲，同時加入富工業風嘅紅色墨鏡同自家製黑翼，絕非日常可以見到嘅造型。佢亦都向我哋介紹佢自製嘅牙刷頸鏈，由佢嘅舊牙刷改裝而成。
講到穿搭入面最鐘意嘅部份，喺幾樣特色單品中，Lilian最喜歡紅色眼鏡，因為戴起嚟望世界都自帶特效。
你心目中嘅BOLD LOOK係？
Lilian (@ioooooi._.ioooooi ) – 「融入自己生活，就好似我條牙刷頸鏈咁。」
本職為美術指導同造型設計嘅Jessica以skinhead造型示人，當日穿搭非常簡潔但不乏亮點，以純黑色入肩背心配同色嘅皮袋，配襯一件鍛面boxing長褲。而Jessica更加同我哋分享，呢條褲係來自媽媽年輕時嘅珍藏，別具意義。
喺展覽裏面，Jessica亦有放上自己嘅作品，有興趣嘅讀者不妨親自去展覽參觀。
你心目中嘅BOLD LOOK係？
Jessica (@jessicawt ) -「一眼可以看穿性格嘅打扮。」
最初留意到Dan嘅原因，可能係因為佢身形較高挑，感覺著起裙上嚟非常適合，所以就邀請佢進行街拍。
Dan以黑白色作主調，以層次配搭，並以皮帶突顯腰線，再以不規則傘裙以及高筒厚底皮靴完成造型，充滿個人風格。問起造型入面最喜愛嘅部份，Dan就認為係佢身上一條結合天秤座與雙魚座符號頸鏈，相信對佢嚟講有特別意義，喺造型入面有如簽名一樣嘅存在。
你心目中嘅BOLD LOOK係？
Dan (@dan_mailbox ) –
「展露自己身體insecure嘅部份，對我嚟講係展露我自己嘅上胸。」